O portavoz de Independentes por Vilagarcía, José Luis Rivera Mallo, presentou un escrito dirixido á alcaldía no que solicita que se repoñan as bandas rugosas que había na estrada de Rubiáns a Zamar e que foron retiradas polas obras de construción do viario de acceso ao Porto.

Segundo indica Rivera Mallo, por mor das obras desapareceron algunhas das bandas rugosas que había nesa estrada para impedir que os vehículos circulasen a máis velocidade da adecuada. Ademais, co paso dos camións e a maquinaria pesada, a outra banda rugosa que había nese tramo está totalmente deteriorada.
Rivera Mallo recorda que nos últimos días houbo tres accidentes de tráfico nese viario, polo que cre que é necesario incrementar a seguridade con medidas reductoras da velocidade.

Ademais da reposición das bandas rugosas que xa existían, Independentes por Vilagarcía solicita á alcaldesa do municipio que se poñan algunhas bandas rugosas máis nesa zona para evitar que se repitan os accidentes.
De momento, as únicas actuacións que levaron a cabo no municipio para obrigar aos coches a circular máis amodo foi a elevación de dous pasos de peóns na avenida da Mariña. O pasado fin de semana houbo que lamentar un novo atropelo en Rodrigo de Mendoza, co que xa van 39 este ano.

(Fuente: La Voz)