-Zona Aberta, FECA e a Unión de Autónomos piden «responsabilidade» aos concelleiros de todos os partidos

O pleno de Vilagarcía debate o xoves un estudo de detalle que abriría as portas a unha gran área de compras-

Son preto de trinta mil metros cadrados situados en Ande-Rubiáns. Un promotor busca levantar neles o que sería o segundo centro comercial de Vilagarcía, probablemente moito máis potente que o da Xunqueira. Polo momento, os pasos administrativos céntranse na aprobación definitiva dun estudo de detalle sobre a zona, que o pleno da corporación municipal aborda este xoves. A información que obra no Concello fala da construción de tres naves. Pero un aspecto, entre outros, delata a verdadeira dimensión do proxecto: o empresario prevé a creación dun espazo de estacionamento suficiente como para acoller 600 vehículos. Un aparcadoiro dunha envergadura que, evidentemente, ninguén deseña a non ser que espere unha copiosa afluencia de público.
O comercio local non tardou en reaccionar ante o que os seus representantes consideran unha verdadeira ameaza. Onte, os primeiros espadas de Zona Aberta, a Unión de Profesionais e Traballadores Autónomos e a Federación de Empresarios da Comarca de Arousa reuníanse coa alcaldesa, Dolores García, e os responsables do goberno municipal para mostrarlles a súa preocupación por esta nova iniciativa. Sofía Beiras, a presidenta da principal asociación que agrupa aos comerciantes vilagarciáns resumía o seu punto de vista minutos antes da cita cos concelleiros: «Trasladar o núcleo do comercio nos arredores da cidade sería un erro. Nós estamos disposto a apoiar a chegada de calquera empresa a Vilagarcía, cantos máis sexamos mellor, pero o que temos que dinamizar é o centro da cidade e o concepto dunha cidade de compras».
O peso dunha moción
Desde o punto de vista urbanístico, o estudo de detalle é irreprochable. Tecnicamente, polo tanto, o documento non ofrece ningún problema para ser aprobado. O asunto, en definitiva, circunscríbese a unha cuestión de vontade política.
Neste sentido, as tres agrupacións de empresarios recollen «a sensibilidade do comercio tradicional e dos hostaleiros, totalmente contrarios á implantación de grandes áreas nunha comarca que conta co suficiente equipamento comercial e que avoga por un modelo de cidades compactas». Por iso, apelan «á responsabilidade dos partidos políticos». O pleno conta xa cunha referencia á hora de abordar este tipo de iniciativas: unha moción, promovida fai anos polo BNG, na que o Concello comprométese a negar o seu respaldo á apertura de grandes superficies desta

(Fuente: Serxio González, La Voz De Galicia)
(Foto: Víctor Mejuto)